រកឃើញ USB Flash ម្យ៉ាងរបស់រុស្ស៊ីអាចបំផ្លាញកុំព្យូទ័រអ្នកភ្លាមៗ
ក្រុមអ្នកស្រាវជ្រាវរបស់ប្រទេសរុស្ស៊ីឈ្មោះថា Dark Purple បានបង្កើតនូវគំរូ USB Flash មួយប្រភេទ ដែលអាចបំផ្លាញបន្ទះសៀគ្វី Motherboard កុំព្យូទ័រទាំងមូលបាន។
USB Flash មួយនោះមានឈ្មោះថា USB Killer 2.0 ដោយមើលទៅដូចទៅនឹង USB Flash ធម្មតាផ្សេងទៀតដែរ ប៉ុន្តែគ្រាន់តែពេលដោតវាចូលទៅក្នុងរន្ធ USB របស់កុំព្យូទ័រភ្លាម វានឹងបញ្ជូនកម្លាំងអគ្គិសនីកម្រិត ២២០ វ៉ុលតាមរយៈរន្ធ USB ដើម្បីចូលទៅបំផ្លាញបន្ទះសៀគ្វី Motherboard ទាំងមូល និងធ្វើឲ្យកុំព្យូទ័រនោះប្រើការលែងកើតតែម្ដង។
នៅក្នុង Blog Post របស់ Dark Purple បានសរសេរថា USB Killer 2.0 គឺអាចបំផ្លាញឧបករណ៍គ្រប់ប្រភេទដែលមានរន្ធ USB មិនថាកុំព្យូទ័រ, ទូរទស្សន៍, Router, Modem ឬ ទូរសព្ទស្មាតហ្វូននោះទេ។
មិនត្រឹមតែប៉ុណ្ណោះ Dark Purple ក៏បានបង្ហោះវីដេអូ Youtube មួយផងដែរ ដែលបង្ហាញពីការធ្វើតេស្ដ USB Killer 2.0 ជាមួយនឹងកុំព្យូទ័រ Laptop ម៉ូដែល Lenovo ThinkPad។ នៅពេលដោតវាចូលក្នុងកុំព្យូទ័រភ្លាម ក្នុងរយៈពេលត្រឹមតែប៉ុន្មានវិនាទីប៉ុណ្ណោះ វាអាចធ្វើឲ្យកុំព្យូទ័ររលត់ ហើយបើទោះបីជាព្យាយាមបើកវាប៉ុន្មានដងក៏ដោយក៏វាមិនដំណើរការឡើងវិញដែរ៕
Post a Comment