Samsung ដាក់លក់ Note 5 ពណ៌ផ្កាឈូកចំថ្ងៃ iPhone 6s ដាក់លក់នៅកូរ៉េខាងត្បូង
ក្រុមហ៊ុន Samsung នឹងដាក់លក់ទូរសព្ទ Galaxy Note 5 ពណ៌ផ្កាឈូកស្របពេលនឹងការចេញលក់ iPhone 6s ជាផ្លូវការនៅក្នុងប្រទេសដើមកំណើតរបស់ខ្លួន។
បន្ទាប់ពីក្រុមហ៊ុន Apple បានចេញលក់ទូរសព្ទ iPhone 6s ក្នុងបណ្ដាប្រទេសមួយចំនួនរួចមកឃើញថា ទូរសព្ទពណ៌ផ្កាឈូកគឺជាពណ៌ដែលពេញនិយមជាងគេក្នុងចំណោមពណ៌ទាំងឡាយ។ ដោយសង្កេតឃើញចំណុចនេះទើបក្រុមហ៊ុន Samsung បានបន្ថែមពណ៌ថ្មីចំនួនពីរ គឺពណ៌ផ្កាឈូក និងពណ៌ប្រាក់ទៅលើទូរសព្ទ Galaxy Note 5 របស់ខ្លួន។ ដូចដែលបានលើកឡើងខាងលើ ទូរសព្ទពណ៌ថ្មីនេះនឹងដាក់លក់ចំថ្ងៃដែល iPhone 6s ចេញលក់នៅប្រទេសកូរ៉េខាងត្បូង គឺថ្ងៃទី២៣ ខែតុលា។
កាលពីឆ្នាំទៅ ទាំងការលក់ក្នុងស្រុកនិងក្រៅស្រុកនៃត្រកូល Galaxy ដែលជាទូរសព្ទប្រចាំឆ្នាំរបស់ក្រុមហ៊ុន Samsung គឺសុទ្ធតែត្រូវបានផ្ដួលដោយទូរសព្ទ iPhone 6 ទាំងអស់។ ជាមួយនឹងការដាក់លក់ពណ៌ថ្មីមួយនេះក្រុមហ៊ុនរំពឹងថា ទូរសព្ទ Galaxy Note 5 របស់ខ្លួនអាចទប់ទល់នឹងការចេញលក់របស់ iPhone 6s បាន។
គួររំលឹកផងដែរថា ថ្ងៃស្អែកនេះ iPhone 6s នឹងដាក់លក់ក្នុងប្រទេសឥណ្ឌា ម៉ាឡេស៊ី និងក្នុងប្រទេសចំនួន៦ផ្សេងទៀត ហើយនៅសប្ដាហ៍បន្ទាប់នឹងដាក់លក់ក្នុងប្រទេសកូរ៉េខាងត្បូងនិងបណ្ដាប្រទេសមួយចំនួនទៀត៕
Post a Comment