Toyota បង្ហាញរថយន្ត Prius C ២០១៦ស៊េរីថ្មី រួមជាមួយនឹងស៊េរីមានកំណត់ពណ៌ពិសេស
ក្រុមហ៊ុន Toyota បានបង្ហាញពីរថយន្ត Prius C ឆ្នាំ២០១៦ បន្ទាប់ពីបានប្រកាសពីរថយន្ត Prius ស៊េរី២០១៦ បានរយៈពេលជាងមួយខែរួចមក។
បើមើលពីរូបរាងខាងក្រៅរបស់ Prius C ស៊េរី២០១៦នេះឃើញថា មិនមានភាពខុសប្លែកអ្វីខ្លាំងនោះទេ បើប្រៀបទៅនឹងរថយន្ត Prius C ឆ្នាំ២០១៥នោះ តែក្រុមហ៊ុនបានបញ្ជាក់ថា រថយន្តនេះគឺមានការរចនារូបរាងខាងក្នុងស្រស់ស្អាតជាងមុន។
ក្រុមហ៊ុនបានឲ្យដឹងផងដែរថា Prius C ស៊េរីថ្មីនេះគឺសន្សំសំចៃប្រេងបានច្រើនជាងមុន ពោលគឺការបើកបរក្នុងទីក្រុងចម្ងាយ១០០គីឡូម៉ែត្រស៊ីប្រេងអស់ត្រឹមតែ ៤,៤៣លីត្រប៉ុណ្ណោះ។ មិនតែប៉ុណ្ណោះគេក៏បានបំពាក់នូវបច្ចេកវិទ្យាសុវត្ថិភាពថ្មីៗរបស់ក្រុមហ៊ុន Toyota ដើម្បីការពារសុវត្ថិភាពអ្នកដំណើរ គឺ Toyota Safety Sense System ដែលមានដូចជា Pre-Collision System, Lane Departure Assist, និង Automatic High Beams ជាដើម។ ចំពោះម៉ាស៊ីនរបស់រថយន្តនេះគឺមានទំហំ១,៥លីត្រ ដែលមានកម្លាំង ៧៣សេះ ព្រមទាំងមាន Driving Mode ចំនួនបីគឺ ធម្មតា, ECO និង EV។
ស្របពេលគ្នានោះដែរ Toyota ក៏បានបង្ហាញពីរថយន្ត Prius C ២០១៦ ស៊េរីមានកំណត់មានឈ្មោះថា Persona Series Special Edition ដោយផលិតតែ១៥០០គ្រឿងប៉ុណ្ណោះ។ ចំណុចពិសេសរបស់ Persona Series នេះគឺរូបរាងខាងក្រៅរបស់វារចនាដោយប្រើប្រាស់តែពណ៌ខ្មៅ លាយជាមួយជម្រើសពណ៌ពីរផ្សេងទៀត។ ជម្រើសពណ៌ដែលមានឲ្យជ្រើសរើសនោះគឺ ពណ៌ខ្មៅលាយពណ៌ស៊ីជម្ពូ និង ពណ៌ខ្មៅលាយពណ៌បៃតងខ្ចី។
ក្រុមហ៊ុន Toyota បានលើកឡើងថា Prius C ស៊េរី ២០១៦ គឺជារថយន្តដែលមានតម្លៃសមរម្យជាងគេក្នុងចំណោមរថយន្ត Hybrid របស់ក្រុមហ៊ុន តែមិនបានបញ្ជាក់ពីតម្លៃនិងកាលបរិច្ឆេទចេញលក់នៅឡើយទេ៕
Post a Comment