Microsoft ហ៊ានទិញ MacBook ចាស់ៗ ៣០០ ដុល្លារបើម្ចាស់វាទិញកុំព្យូទ័រ Windows 10
ថ្មីៗនេះក្រុមហ៊ុន Microsoft បានដំណើរការកម្មវិធីផ្សព្វផ្សាយថ្មីមួយដើម្បីជំរុញឲ្យអ្នកប្រើប្រាស់កុំព្យូទ័រ MacBook ឬ iMac ប្ដូរមកទិញប្រើកុំព្យូទ័រដែលដំណើរការ Windows 10 របស់ខ្លួនវិញ។
កម្មវិធីថ្មីនោះមានឈ្មោះថា “Easy Trade Up ” ដោយធ្វើឡើងដើម្បីទិញយកកុំព្យូទ័រ Laptop MacBook ឬ iMac ប្រើរួចក្នុងតម្លៃ ៣០០ ដុល្លារ ប្រសិនម្ចាស់ពួកវាប្ដូរមកទិញកុំព្យូទ័រដំណើរការដោយ Windows 10។ ចំពោះលក្ខណវិញគឺត្រូវមានរយៈកាលប្រើប្រាស់តិចជាង ៦ ឆ្នាំ នៅប្រើប្រាស់កើត និងមានទំហំអេក្រង់តូចបំផុតត្រឹម ១១,៦ អ៊ីញ។
កម្មវិធីនេះដែរគឺធ្វើនៅក្នុងបណ្ដាប្រទេសមួយចំនួនមានដូចជា សហរដ្ឋអាមេរិក អង់គ្លេស កាណាដា ឥណ្ឌា ប្រេស៊ីល បារាំង អាល្លឺម៉ង់ និង តៃវ៉ាន់ ហើយធ្វើឡើងចាប់ពីថ្ងៃទី ១៤ ដល់ ទី ២០ ខែតុលាឆ្នាំ ២០១៥។
ក្នុងនោះដែរក្រៅពីផលិតផល MacBook និង iMac សម្រាប់កុំព្យូទ័រ PC ធម្មតាផ្សេងទៀតគឺក្រុមហ៊ុន Microsoft នឹងផ្ដល់ជាតម្លៃ ២០០ ដុល្លារ ប្រសិនបើអ្នកប្រើប្រាស់ងាកមកទិញកុំព្យូទ័រដំណើរការដោយ Windows 10។
ចំពោះកម្មវិធីផ្សព្វផ្សាយបែបនេះគឺមិនមែនជាលើកទីមួយនោះទេ ដែលក្រុមហ៊ុន Microsoft បានធ្វើដើម្បីបញ្ចុះបញ្ចូលអ្នកប្រើប្រាស់ផលិតផលរបស់ក្រុមហ៊ុនផ្សេងៗឲ្យងាកមកប្រើផលិតផលរបស់ខ្លួន។ជាក់ស្ដែងក្រុមហ៊ុនក៏ធ្លាប់បានផ្ដល់ជាទឹកប្រាក់ដល់ទៅ ៦៥០ ដុល្លារសម្រាប់ការប្ដូរ MacBook Air មកយក Surface Pro 3 ជាដើម។ ក្រៅពីនេះក៏នៅមានផលិតផលផ្សេងៗជាច្រើនទៀត៕
Post a Comment